پیار جے کر گناہ ہے تاں محشر دے ڈینہہ، تیڈے سارے گناہ میڈے ذمے تھۓ۔۔۔۔

۔۔۔۔۔۔۔۔۔۔۔(سئیں اصغر گرمانی )۔۔۔۔۔۔۔۔۔۔۔
پیار پوجا اے پیار اے عبادت سجنڑ,
پیار زندہ رہنڑ کیتے ساہ ہوندا ہے،
پیار دل اے تے دلدار وی پیار ہے،
پیار روح دے تعلق دا راہ ہوندا ہے،
ساری دنیا دےفتنے فسادیں کنوں،
پیار محفوظ جئ ہک پناہ ہوندا ہے۔
پیار ذاتیں صفاتیں کنوں معتبر،
پیار شاہیں دا وی شہنشاہ ہوندا ہے۔
پیار ہےتاں زمیں چندر تاریں کنوں،
اچیاں پروازاں خاکی وکھیندا ودۓ،
پیارنئیں تاں اے کیا اے جوبندا بشر،
ہک تصور کوں سجدے کریندا ودۓ۔
اےنئیں سمجھا تاں آ میں ڈساواں تیکوں،
پیارسچا ہے رب دی عطا پیار ہے،
پیار پھل اے تے پھلاں دی شبنم وی ھے،
پیار رم جھم ہے باد صباپیار ہے،
پیار ساجد دے سجدے دے اندر ڈسے،
جیہڑا مسجود ہے او خدا پیار ہے،
پیار موت اے تاں موت اچ بقا ہوندی ہے،
پیار ڈکھ اے تاں ڈکھ دی دوا پیار ھے۔
میں تیکوں پیار کیتے تاں وزبر جۓ،
ڈکھ ساری حیاتی دے ہن سارے نمے تھۓ،
پیار جے کر گناہ ہے تاں محشر دے ڈینہہ،
تیڈے سارے گناہ میڈے ذمے تھۓ۔۔۔۔
توں سخی ہیں تیڈا کم سخاوت جوں ہے،
نمی آہدا جو ایں نہ تے ایں حال ڈے،
نمی آہدا جو پہلے بہوں کاہل ہن
نمی آہدا جونہ کوئی نواں کاہل ڈے،
نمی آہدا جو میں تیڈا بھائیوال ہاں
نمی آہدا جو بھائیوالی بھائیوال ڈے،
نمی آہدا جو اکرس ہے ہاں ہس پئے،
آ میڈی تسی روح کوں وی پنڑیال ڈے۔۔
اتنا احساس کر بنڑ کے گستاخ میں
آکھ باہواں نہ سانول سہیندا ودۓ
میں پیغمبر تاں نئیں ول سرعام کیوں،
میکوں مالک بازار اچ وچیندا ودئے۔۔۔
انجیں نائب خدا ہاں مگر دوستا،
میڈا سردار توں،
میڈا سلطان توں،
میڈی اکھیاں دا چاننڑ،
میڈی زندگی،
میڈی پوجا وی توں،
میڈا بھگوان توں،
کیچ بھنبور توں،
تھل دے ٹبڑے وی توں،
رلی سسی دا حاکم پنل خان توں،
میں تیڈے پیریں رلدے پچھاویں جیا،
میڈی قامت بلندی،
میڈاشان توں،
تیڈا ہر ہک حکم میڈے سر اکھیں تے،
ایندی تعمیل کوں بندگی آکھساں،
توڑے ہوساں جنازے دے بستر اتے
میکوں سڈ ماریں توں
تیکوں جی آکھساں.۔۔۔۔۔